கிளைகளில் மிளிர்ந்தால் எழில் 

பூஜைக்கு சென்றால் புனிதம்

காதலர் கைகளில் மோகம் 

கூந்தலில் அமர்ந்தால் கவர்ச்சி

விருந்தாளி கொடுத்தால் பரிசு

சட்டைப் பொத்தானில் கெளரவம்

பக்தன் வழங்கினால் விண்ணப்பம்

மறைந்தவன் அருகே அஞ்சலி

சர்ச்சைகுப்பின் கிடைத்தால் மன்னிப்பு 

மணமாலையில் தொடுத்தால் உறவு 

மயானத்தில் இருந்தால் காணிக்கை

மண்ணில் விழுந்தால் நினைவு 

 கூடாரமாய் நீலவானப் பலகை

அதனடியில் தூரிகையிட நீளும்

லட்சிய மரங்கள்

தொலைவில் கிழிந்த தாளைப்போல்

மலை நுனிகள்

அதன் தோளிறங்கி

தரை தவழ்ந்தோடும் 

தளிரோடை

இந்த சூழலில் 

என் எளிய குடிசை

என்னைச் சுற்றி

சூரிய அடுப்பில் இயற்கை சமைத்த

விருந்து பண்டிகை 

பார்க்கப் பார்க்க பசியடங்கா நான் 

காய சண்டிகை

 இந்தப் பிறவியில் புறக்கணித்த

பாதைகளில் பயணிக்க,

வேண்டும் இன்னொரு பிறவி

சொல்ல நினைத்து தயங்கி

சிறைப்படுத்திய உண்மைகளை சிறகடிக்க

சிந்திய திவலைக்குள் சமத்தாகப் பொருந்தும் நீர் போல் வாழாமல்

காற்றில் கலந்தும் தன் மணம் காக்கும்

முல்லைப்பந்தலின் முகை போல வாழ,

வேண்டும் இன்னொரு பிறவி

பிறர் பார்வைக்கு எனைத்திருத்தாமல்

என் பார்வைக்கு பிறரைத் சுருக்காமல்,

உள்ளதை உள்ளபடி

கிடைத்தது கிடைத்தபடி

வரவேற்று உறவாட,

வேண்டும் இன்னொரு பிறவி

தனி மனித சுதந்திரம் பலியாகித்தான்

பொது நலம் காக்கமுடியுமென்றால்

இருசாரியும்  தத்தம் கொள்கைகளை அனுசரித்து மறுபரிசீலனை செய்து

எதிர் வாதத்தை பாதிவழியில்

சமரசம் செய்யும் நிலை காண 

வேண்டும் இன்னொரு பிறவி

வெற்றி பெற்றவனின் மை கொண்டு

சரித்திரம் எழுதாமல்

தொல்வியுற்றவனின் தழும்புகளையும்

தவிப்புகளையும் ஏக்கங்களையும்

தவறாமல் சேர்த்தெழுதும் உலகில் வாழ

வேண்டும் இன்னொரு பிறவி

பெரும்பான்மையின் ஊர்வலத்தில்

பங்கேற்காத 

செல்வாக்கு ஏணியில்

சீராக உயர்ந்து

சுக போக வாழ்வை சுவைத்து கொண்டிருக்கும் சீமான்கள்

சமரசத் தீயில் சாம்பலாகி 

சமத்துவம் போற்றும் நிலை காண 

வேண்டும் இன்னொரு பிறவி